K-pop: Ang
Pagtangkilik at Epekto ng Musika ng mga Koreano sa mga Pilipino.
Isa sa mga libangan ng mga Pilipino ay ang kumanta. Mapatagalog,
Ingles o kahit anong lenggwahe pa iyan basta’t nagustuhan nila asahan mo’t
kankantahin nila ito kahit hindi nauunawaan ang liriko. Maliban sa mga awiting
Pilipino marami pa ring mga awitin na nagmula sa iba’t ibang bansa ang mas
tinatangkilik ng mga Pilipino lalong-lalo na ang mga kabataan sa panahon
ngayon. Nandiyan ang A-pop (American Pop Music), J-pop (Japan Pop Music) at
higit sa lahat ang K-pop (Korean Pop Music). Ang K-pop ay mga awiting nagmula
sa bansang Korea partikular sa bahaging Timog ng Korea. Dahil sa likas na hilig
ng mga Pilipino sa iba’t ibang uri ng awitin madaling nakuha ng K-Pop ang
atensyon ng mga kabataang Pilipino. Karamihan sa mga nahuhumaling dito ay
pauli-ulit na pinapanuod o pinapatugtog ang mga music videos ng kanilang mga
iniidolo. Ilan sa mga mangangawit at mananayaw na tinatangkilik at hinahangaan
ng mga Pilipino lalong-lalo na ng mga kabataan ay ang Girls’ Generation, Super
Junior, Exo, Shinee, Sistar, 2pm, 2am, 4minute, Big Bang at 2ne1 na kung saan
kabilang si Sandara Park na may dugong Pilipino. Gumagastos ng malaki ang mga
fan ng bawat K-pop group para lang makabili ng mga album ng kanilang idolo o
hindi naman ay tiket kung may gagawing pagtatanghal ang kanilang idolo sa
bansa. Ngunit hindi lang sa pagbili ng mga album at tiket natatapos ang
pagtangkilik ng mga Pinoy sa K-Pop, may ibang fan ang bumubili ng mga damit,
kuwentas, singsing, pamaypay, posters, notebooks, sticker at iba’t ibang
produkto na may imahe o kinalalaman sa kanilang idolo. Dahil din sa K-pop
unti-unting nakikilala sa Pilipinas ang wika ng mga Koreano. May mga K-Pop fan
ang nag-aaral magsalita ng wikang Koreano para maunawaan nila ang liriko ng
isang awitin. Marami din ang gumagaya sa pananamit at hairstyle ng kanilang mga
K-Pop idol. Nagsusuot sila ng mga damit at nagpapakulay ng buhok na katulad sa
kanilang mga idolo ngunit hindi naman bagay sa kanila. Ang mga ito ay isang
patunay kung gaano kasikat ang K-Pop sa ating bansa. Ngunit paano nga ba
sumikat o nakilala ang K-Pop sa ating bansa? Ano ang dahilan ng mga Pilipino
kung bakit nila ito tinatangkilik? Ano ang maaring maging epekto ng K-Pop sa
awiting Pilipino?
Mapabata
o matanda ay napapaindak sa tuwing pinapatugtog ang tinaguriang World Phenomena Music na Gangnam Style
na inawit at pinasikat ng isang Koreanong manganganta na si Psy. Sa bawat
okasyon hindi mawawala ang kantang ito. Ang mala-horse riding step, nakakaindak
na tugtog at madaling steps ng kanta ang naging dahilan kung bakit ito
nagustuhan ng mga tao. Ngunit bago pa man makilala ang Gangnam Style sa bansa
ay may iba’t ibang kantang Koreano na ang nauna pa dito. Paano nga ba nakilala
ang mga awiting Koreano sa ating bansa? Ayon sa ibang mga K-Pop fans na
kakilala ko sa social networking sites na facebook, nakilala daw ang K-Pop
dahil sa mga Korean Novela o Drama na pinapalabas sa iba’t ibang istasyon sa ating
bansa, dahil dito mas lumawak ang kaalaman ng mga Pinoy sa kultura ng mga
Koreano at ito din ang naging daan para makilala ang kanilang musika. May mga
nagsabi din naman na dahil sa pagsikat at pagsali ni Sandara Park sa isang
grupo ng mga kakabaihan sa Korea na kilala sa tawag na 2ne1. Taong 2003 na
nagsimulang magpalabas ng mga Asianovela na kalimitan ay galing sa Korea,
kasabay din nito ay ang pagsulpot ng mga awiting Koreano tulad ng ‘Because I’m
A Girl’ ng grupong KISS, nasundan pa ito ng mas matatandaan nating awitin
na‘Answer The Phone’ ni si Shim Mina, ang awiting ito ay madalas magamit
sa mga programa sa paaralan at sa kahit anong sayawan noon dito sa bansa. Ngunit
hindi pa naman ganun kasakit ang K-pop dahil sa mga banyagang manganganta
katulad nila Britney Spears, Avril Lavigne at mga banda kagaya ng Goo Goo Dolls
at Linkin Park. Subalit sa paglipas ng panahon unti-unting nakikilala ng mga
Pilipino ang K-Pop. Nariyan si Rain na sinasabing unang Koreano na minahal ng
mga Pilipino. Hanggang sa dumating ang taong 2009 na sinasabing ang pagsilang
ng K-Pop sa bansa. Sa panahong ito ganap na nakilala ng mga Pinoy ang K-pop
dahil sa awiting ‘Nobody’ ng grupo Wonder Girls na naging patok sa mga Pilipino
lalo na sa mga kabataan. At ang pagsulpot ng kantang ‘Fire’ at ‘I don’t care’
na kinanta ng grupong 2ne1 na kung saan kabilang ang pambansang krungkrung na
si Sandara Park. Simula noon nagsunod-sunod na ang pagsulpot ng iba’t ibang
K-Pop group sa bansa at hindi na mawawala sa music chart ng MYX ang mga awiting
Koreano na kung minsan ay nangunguna pa sa listahan. Maraming mga K-Pop group
ang pumupunta sa bansa para magtanghal, nariyan ang Super Junior na limang
beses nagtanghal sa bansa, ang Dream K-Pop Fantasy Concert na isinagawa noong
isang taon taon na kung saan dinaluhan ng anim na K-Pop group na nagpatili sa
mga Pilipino.
Sa madaling
salita ang K-Pop ay nagsimula sa bansa dahil sa pagpapalabas ng mga Korean
drama sa telebisyon, mga music video ng mga K-pop group sa MYX at maaaring
dahil na din sa ibang Pinoy na gumagawa ng pangalan sa industriya ng musika sa
bansang Korea.
“Sa oras na naging K-Pop fan ka mahirap na
itong talikuran.” Ito ang sinabi sa akin ng aking kakilalang kapwa K-pop
fan. Aminado akong mahirap nang makawala o talikuran ang pagiging isang K-pop
fan dahil ako mismo kahit anong pilit kong tigilan ang panunuod at pakikinig ng
mga K-pop music ay hindi ko magawa, para itong sakit na HIV Aids, walang lunas
o gamot. Ngunit paano nga ba nagiging K-pop ang isang tao? Sa aking kaso ang
dahilan kung bakit ako nahumaling at tinangkilik ang K-pop ay dahil sa isang
K-Pop girl group na Girls’ Generation. Unang beses ko pa lang silang napanuod
sa telebisyon na kumakanta habang nagsasayaw ay nahumaling na agad ako sa
kanila. Humanga ako sa kanila dahil sa galing nilang sumayaw, kumanta at
siyempre dahil sa kanilang magaganda mukha at hugis ng katawan. Magmula noon
naging adik na ako sa kanila at sa K-Pop. Walang araw ang hindi ko pinapatugtog
ang kanilang awitin at pinapanuod ang kanilang music video. Walang araw ang
hindi ko tinitingnan ang kanilang mga litrato. Nagsimula na din akong
mangolekta ng mga album nila at iba’t ibang produkto na may kinalalaman sa
kanila. At sa tuwing gagamit ako ng internet ang una kong ginagawa ay ang
maghanap ng mga bagong balita tungkol sa kanila at sa K-Pop p hindi naman kaya
ay mag-download ng mga K-pop songs, videos o shows. Iisa lang ang ibig sabihin
nito ako ay isa na sa libo-libong tao na nahuhumaling sa K-Pop.
May
mga dahilan ang bawat K-Pop fan kung bakit nila ito tinatangkilik. Sang ayon sa
kay Sablan sa kanyang artikulo sa Philippine Daily Inquirer na sinipi naman ni
Alanzalon sa kanyang pag-aaral, sinasabi na ang buong mundo ay humahanga at tumatangkilik
sa K-Pop. Ang pinakapopular ngayon ay ang mga grupo ng mga kalalakihan at
kababaihan sa Korea na may magagandang mukha, hugis ng katawan, talentado, stylish pagdating sa pananamit at magaling mag-entertain ng mga tao.
Naniniwala ako na bago magustuhan ang isang K-Pop music, ang una munang
tinitingnan ng mga tao ay kung sino ang kumanta ng isang awitin. Kung maganda o
gwapo ang manganganta hindi malabong madami ang magkagusto sa kanyang awitin.
Sa mundo ng K-Pop mahalaga ang pisikal na anyo bago ang talento. Pero hindi sa
lahat ng pagkakataon ganun ang nangyayari minsan kahit hindi natin kilala ang
manganganta basta nagustuhan mo ang tono at ang paraan ng kanyang pag-awit ay
naaadik na tayo dito. Katulad na lang sa mga OST o ang mga theme song ng bawat
Korean drama na pinalalabas sa bansa, may mga awitin doon na tumatatak sa ating
isipan at nagiging paborito natin. Ang isang maganda halimbawa nito ay ang
awiting ‘Almost Paradise’ na naging theme song ng Korean Drama na Boys Over
Flower na sikat na sikat noon. Tanda ko pa noon sa aming paaralan na halos
lahat ng mga estudyante doon ay alam ang awiting ito. May iba pa nga na
kinakanta ito kahit mali naman ang lyrics. Hindi man alam ang liriko basta’t
alam ang tono paniguradong pauli-ulit itong kakantahin kahit ito ay mali- mali.
Ang sabi nga ng iba hindi mahalaga kung hindi nauunawaan ang liriko ang
mahalaga ay nagustuhan nila ito. At katwiran pa ng iba may makikita naman
silang English translation nito. May iba naming isinasalin sa wikang Ingles o Filipino
ang isang awiting Koreano nang sa gayun ay lubusan itong maunawaan ng mga
Pilipino.
Hindi man lubos na nauunawaan ang
liriko hindi naman ito naging hadlang para makilala ang K-pop sa buong Asya at
sa ibang kontinente. Pero bakit nga ba ito tinatangkilik ng mga Pilipino at ng
mga tao sa buong mundo? Ayon sa aking nabasang artikulo na sinulat ni Janyx sa
sa kanyang blogspot, may tatlong dahil kung bakit patuloy na tinatangkilik ng
mga tao ang K-pop. Ang una nga rito ay madaling matandaan ang mga kanta nila dahil may
stratehiyang ginagamit ang mga Korean musical composers lalo na sa mga pop
songs nila. Nilalagyan nila ito ng mga elementong madaling masasabayan ang
melodiya at ritmo. May ilang K-pop music ang madaling sabayan dahil ang ilang
liriko dito ay paulit-ulit lang at madaling tandaan o hindi naman ay nakasulat
sa wikang Ingles. Katulad na lang sa kantang Gee ng Girls’ Generation na
paulit-ulit lang ang chorus at ang mga salitang Gee, Baby at No, ganun
din sa kantang Gangnam Style na paulit-ulit binanggit ang mga salitang Oppa Gangnam Style at Oh, sexy
lady. Ayon pa sa pahayag ni Immortalsoul123 sa kanyang isang website sinabi
niya na bagamat hindi naiintidihan ang lyrics ng mga awiting K-pop pero sulit
naman itong pakinggan dahil sa maraming mga unique themes at wholesome lyrics.
Kompara sa mga awiting nagmula sa America na kalimitan ang tema ng awtin ay
tungkol sa sex, drugs or alcohol na kung minsan ay hindi maganda para sa mga
kabataan.
Ang pangalawan naman ay ang pisikal
na anyo ng mga K-pop artist. Masusi ang screening at auditions ng mga Koreano
para maging miyembro ng isang K-pop group. Bukod sa talento, ang isa sa mga
mahalagang requirement ng mga star companies management ay maganda’t gwapong
mukha at magandang hugis ng katawan. Kaya naman kahit saang lupalop ng mundo
pumunta ay pinagtitilian sila ng mga tao. Ayon din sa mga K-pop fan na aking
tinanung sa pamamagitan ng facebook, sinabi nila na ang unang daahilan nila sa
tinatangkilik ng K-pop ay dahil sa magaganda at gwapo ang mga K-pop artist. Ang
ganda daw kasi nilang panuorin habang sumasayaw at kumakanta, napapaindak at
napapakanta din daw sila. Ang pisikal na anyo ng mga K-pop artist ay isang
mahalagang salik kung bakit madaming tao ang tumatangkilik sa K-pop.
At ang panghuli ay kakaibang fashion
at hair style ng mga K-pop artist. Sa tuwing nanunuod ako ng mga music video ng
mga paborito kong K-pop group una kong napapansin ay ang kakaiba nilang mga
suot na damit at ang makukulay nilang buhok. Masasabi kong ang astig nilang
tingnan at parang kahit anong klaseng damit ang suotin nila at kahit anong
kulay ng buhok mayroon sila ay ang ganda at gwapo parin nilang tingnan.
Sa sobrang kasikatan ng mga K-pop
groups sa bansa gumagawa ng mga fanpage ang mga fans ng bawat grupo para
makipagkomunikasyon sa kapwa fans nila. May ilan din gumagawa ng mga meeting
events na kung saan nagtitipon-tipon ang mga tagahanga ng bawat grupo para
makilala at makisalamuha ang iba pang mga fans na nagmula sa ibang lugar at
para ipagdiwang anibersaryo ng isang grupo. Gumagastos ng sobrang laki ang mga
fans para lang makabili ng latest album ng kanilang idolo o hindi naman ay
makapunta sa concert. May ilang pumupunta pa sa Korea para lang masilayan ng
personal ang kanilang iniidolo.
Malaki ang naging impluwensya ng
K-pop sa industriya ng musika sa Pilipinas. Kung mapapansin natin ngayon may
mga nagsusulputan na ding mga grupo ng kalalakihan at kababaihan sa bansa na
sumasayaw habang kumakanta. Ang isang magandang halimbawa nito ay ang Gimme 5
at ang Chichers na pawang parehong boy group. Ang paraang ng pananamit at porma
nila ay parang katulad ng sa mga K-pop group. Noon hindi pa uso ang pagbuo ng
mga grupo pero simula nang dumating ang K-pop sa bansa, nagsimula nang buo ng
mga boy o girl group ang mga entertainment company sa bansa.
Hindi masama ang gumaya sa kung ano
ang uso pero sana naman ay tingnan din muna natin kung bagay ba ito sa atin.
Hindi naman ibig sbihin na pagginaya ng Pilipinasang K-pop ay sisikat na din
ang mga awiting Pilipino.
Maraming usap-usapan na unti-unting namamatay o
natatabunan ang mga OPM songs dahil sa pagdating ng K-pop sa bansa. Pero hindi
naman tunay na namamatay ang OPM dahil habang mayroong mga Pilipinong
mangangawit, nagmamahal at nagpapahalaga sa mga awiting Pinoy, hindi ito
kailanman man mamatay. Ayon sa OPM artist na si Jim Paredes, ang paraan na
ginagawa ng Korea para ipalaganap ang kanilang musika ay maaaring maging modelo
ng Pilipinas para maibangon ang OPM. Maaaring maging modelo pero hindi gayahin.
Katulad na lang ang ginagawa ni Juris Fernandez na gumagawa ng pangalan sa
Korea. Gumawa siya ng isang album na ang mga laman ay puro K-pop songs na
binigyan niya ng sarili niyang interpretation. Ilan sa mga kantang kasama sa
album niya ay ang kantang If na pinasikat ni Kim Taeyeon na miyembro ng Girls’
Generation at ng awiting Don’t Forget ni Baek Jiyoung. Isa lang itong patunay
na hindi nating kailangang gayahin ang lahat ng ginagawa ng mga K-pop artist,
ang sumayaw habang nakanta, ang magpakulay ng buhok at magsuot ng magagarang
damit. Kung gusto nating makilala ng buong mundo ang ating mga awitin, iwasan
natin ang maging anino ng ibang bansa.
Sinabi pa ni Jim sa panayam ni Rida Reyes sa
Balitanghali, “Korean
singing Korean, Chinese singing Chinese... tayo lang ang hindi ganun. Mobilize
Filipino who speaks Filipino to the world.” Ito maaari ang naging dahilan kung
bakit nagkaroon ng P-Pop sa ating bansa para itaguyod ang mga awiting Pinoy.
Ano man ang mangyari hindi na maaalis ang kulturang K-pop sa ating
bansa lalo na ngayong lalong lumalakas ang impluwensya nila sa buong mundo.
Patuloy na mamamayagpag ang K-pop sa
ating bansa dahil patuloy ang pagsuporta ng mga Pilipino dito. Kung ako ang
tatanungin kung ano ba talaga ang unang dahilan kung bakit patuloy na
sinusuportahan ng mga Pilipino at naging popular ang K-pop ay dahil sa mga
naggagandahan at naggagwapuhang mga K-pop group na kanilang iniidolo. Kasi ako
aminado ako na kaya ko patuloy na tinatangkilik at sinusuportahan ang K-pop ay
dahil sa mga idolo ko. Siguro kung wala sila malaki ang posibilidad na hindi
ako isang K-pop fan.